Веќе неколку години тротоарите долж улицата Филип Втори Македонски, на потегот од крстосницата кај плоштадот Скендербег па сѐ до Министерството за надворешни работи, се блокирани од паркирани автомобили. Тука навистина е тешко да се движат пешаци иако и ним како и на автомобилите би требало еднакво да им се гарантира слобода и безбедност при движењето.

На овој простор очигледно дека ретко казнува полицијата, инаку, можеби досега ќе се сменеа лошите навики на оние кои „само на пет минути“ ги оставаат возилата паркирани пред тамошните министерства и институции или на вработените во нив кои веројатно ги мрзи да ги паркираат автомобилите во подземните гаражи.

Притоа, градското претпријатие задолжено за регулирање на паркирањето „Градски паркинг“ иако на располагање има и блокатори за тркалата и „пајаци“ со кои ги подигна непрописно паркираните, очигледно,  ретко свратува на оваа улица.

Секојдневно поминувам по улицата одејќи на работа и ова што тука се случува навистина е срамно. Не може човек да оди по тротоар. Ниту полиција сум видела да казнува, ниту сум видела „пајак“ да крева возило, иако постојано „оперираат“ низ цел град. Што е работата, затоа што станува збор за министерства и државни инситуции  па тие автомобили се привилегирани? Секој ден е хаос тука – револтирано коментира скопјанката Марија С.

Сите институции кои се лоцирани од двете страни на улицата имаат свои паркинзи, некои подземни, некои надземни. Притоа, на неделно ниво, според податоците од јавните претпријатија низ Скопје се изрекуваат неколку стотици казни за неправилно паркирање, но нема информација дали некој е казнет на оваа улица.

Редно е законот подеднакво да важи за сите возачи па „пајаците“ и полицијата да се позанимаваат и да го регулираат хаосот со паркирањето што се случува на улицата Филип Втори Македонски. Конечно, редно е да им се вратат тротоарите на пешаците.