Кривична пријава против тројца осомничени е поднесена за крвничкото претепување на бездомното куче во кругот на фирма во индустриската зона Момин Поток во ноември, објави „А1он“.

Случајот со кучето, кое подоцна го доби името Феликс, ја згрози јавноста откако се појави вознемирувачка снимка на која се гледа како вработен во фирмата брутално го претепува кучето со метална шипка. Феликс вчера, месец и половина по ужасниот инцидент, угина во стационарот на скопското јавно претпријатие „Лајка“.

Од МВР за „А1он“ информираат дека кривичната пријава е поднесена за кривичното дело „мачење животни“, казниво според членот 233 од Кривичниот законик, за кое е предвидена парична или казна затвор во траење до шест месеци. И покрај бројните слични случаи на бруталност кон животните за кои дозна јавноста, за кои беа поднесени пријави, не е познато дека некој во земјава досега бил осуден на затворска казна за ова дело.

„СВР Скопје до надлежното Основно јавно обвинителство Скопје, поднесе кривична пријава со КУ број 7367 против Љ.К.(61), Б.Б.(64) и З.Д.(74), сите од Скопје. За сите дополнителни информации може да се обратите до надлежното ОЈО Скопје, во чија надлежност за постапување е горенаведената кривична пријава“, велат од МВР.

Обвинителството засега не открива во кој стадиум е постапката околу кривичната пријава. Според информациите кои ги објавија некои медиуми, кучето било крвнички претепано само поради тоа што тоа извршило нужда пред складиштето во Момин Поток.