„Трипадвајзор“, најголемата светска платформа за патување, го претстави најновото издание на „Награди според избор на патниците најдобрите од најдобрите“ (The Travelers Choice Awards best of the best), овој пат за најдобрите плажи за 2025 година. Престижната листа се базира на сеопфатна анализа на глобалните прегледи на плажите на платформата во текот на минатата година, а на првото место се најде дестинација во Грција.

Имено, плажата „Елафониси“ на Крит е прогласена за најдобра плажа за 2025 година, позната по кристално чистите води и километрите песок со розова боја. Грчката плажа се врати на листата по четири години, искачувајќи се за неверојатни 23 места за да го заземе првото место.

Покрај неверојатната убавина, оваа плажа е опкружена и со шума, што ја прави одлично место за пешачење. Необичниот розов песок на „Елафониси“ е предизвикан од светло-црвените пигменти во микроорганизмите во морето кои се мешаат со белиот песок на плажата.

Розовата боја на песокот е највидлива по линијата на водата, а интензитетот на бојата зависи од фактори како што се временските услови и плимата и осеката.

Ако сакате да ја посетите оваа светски позната плажа, но не сакате да бидете помеѓу голем број туристи, најдобро е да ја посетите вонсезона. Мај и септември нудат топло, сончево време со значително помалку метеж во споредба со летните месеци. Плажата нуди лежалки и чадори за изнајмување, но на плажата нема природна сенка, затоа понесете свој чадор и капи во случај лежалките да се веќе зафатени.

Ако сакате да ја искусите оваа плажа од соништата, најлесниот начин да го направите тоа е да летате до Ираклион – главниот аеродром на островот Крит, а потоа да изнајмите автомобил и да возите до градот Ханија на северозападниот брег на островот. Од Ханија, плажата „Елафониси“ е околу час и половина возење.

Втората најубава плажа во светот е плажата „Банана“ во Пукет, Тајланд. Оваа неверојатна плажа е позната не само по својата неверојатна убавина, туку и по кристално чистата вода и мирната атмосфера.

Плажата „Банана“ нуди и фантастични можности за нуркање и пловење, со корални гребени за истражување и патувања со брод. Совршено време за посета на овој дел од рајот е од ноември до март кога Пукет ужива ведро небо, суво време и мирно море.

Топ 10 најдобри плажи во светот:

– Плажа „Елафониси“, Крит, Грција

– Плажа „Банана“, Пукет, Тајланд

– Плажа „Игл“, Орањестад, Аруба

– Плажа „Сиеста“, Сиеста Ки, Флорида

– Плажа „Фалесија“, Алгарве, Португалија

– Плажа Варадеро, Варадеро, Куба

– Плажа „Баваро“, Пунта Кана, Доминиканска Република

– Плажата „Муро“, Мајорка, Шпанија

– Плажа „Келигкин“, Нуса Пенида, Индонезија

– Плажа „Миртос“, Кефалонија, Грција