Порастот на случаите на рак на дебелото црево кај помладите станува сè поголем предизвик за јавното здравје. Меѓутоа, новите истражувања покажуваат дека секојдневното консумирање млеко во комбинација со намирници богати со растителни влакна, како што се слаткиот компир (батат) и јаболката, може да игра важна улога во превенцијата на болестите.

Неодамнешните студии покажаа дека млекото, млечните производи, јаглехидратите и влакната можат да го намалат ризикот од развој на колоректален карцином (рак на дебелото црево). Иако се потребни дополнителни истражувања, експертите сметаат дека со донесување паметни секојдневни одлуки за исхраната, можеме значително да го намалиме ризикот од развој на овој тип на рак.

За разлика од претходните совети кои често подразбираа елиминирање на одредени групи на храна, најновите наоди ги истакнуваат придобивките од додавањето на одредени јаглехидрати и влакна, како и млечни производи, во урамнотежена исхрана.

– Ова ново истражување подлабоко го разгледува сложениот однос помеѓу исхраната, здравјето на цревата и развојот на ракот. Ја нагласува важноста на балансиран и информиран пристап кон исхраната како дел од сеопфатната стратегија за превенција од ракот на дебелото црево – рекол д-р Стивен Ли-Конг, шеф на колоректална хирургија.

Експертите истакнуваат неколку клучни елементи во новиот пристап за превенција од болести. Сè повеќе докази укажуваат на клучната улога на цревната микробиота – сложена заедница на микроорганизми во нашиот дигестивен систем – во зачувувањето на здравјето и заштитата од болести како што е ракот на цревата.

Кои се препораките на експертите?

– Одредени намирници, како што се оние што содржат влакна, селективно ги хранат корисните бактерии во цревата, со што придонесуваат за поздрава цревна средина и потенцијално го намалуваат ризикот од рак. Од друга страна, исхраната богата со преработено месо и сиромашна со влакна може да го поттикне растот на штетните бактерии кои предизвикуваат воспаленија и придонесуваат за развојот на болести.

– Влакната, кои се наоѓаат во намирниците како што е слаткиот компир (батат), го зголемуваат волуменот на столицата и го забрзуваат поминувањето низ цревата, а со тоа ја намалуваат изложеноста на цревната слузница на потенцијални канцерогени. Ферментабилните влакна, исто така, се разложуваат со делувањето на цревните бактерии во масните киселини со краток синџир, како што е бутират, кои имаат противвоспалителни и антиканцерогени својства.

– Досегашните препораки кои повикуваа на избегнување на сите јаглехидрати сè повеќе се менуваат. Експертите сега истакнуваат дека, иако рафинираните јаглехидрати и додадените шеќери можат да поттикнуваат воспаленија и отпорност на инсулин, што го зголемува ризикот од рак, сложените јаглехидрати од целите зрна, овошјето и зеленчукот ги обезбедуваат многу потребните хранливи материи и влакна кои се корисни за здравјето на цревата и може да имаат заштитен ефект.

Се појавуваат докази дека млечните производи, особено млекото, може да имаат заштитен ефект против колоректалниот рак. Овој ефект може да биде поврзан со присуството на калциум, витамин Д и други биолошки активни соединенија во млечните производи. Сепак, потребни се повеќе истражувања за целосно да се разберат овие потенцијални предности.

– Иако исхраната игра важна улога, редовното тестирање и понатаму останува најделотворниот начин за рано откривање и лекување на ракот на дебелото црево – рекол Глен С. Паркер, заменик водач на Одделот за хирургија и шеф на Одделот за колоректална хирургија.

– Повеќето луѓе треба да започнат со прегледи за колоректален карцином на 45 години. Златниот стандард за преглед останува колоноскопијата бидејќи лекарот може веднаш да ги отстрани полипите во текот на процедурата – продолжува тој.

Д-р Паркер истакнува дека луѓето со висок ризик од рак на цревата – вклучително и оние со семејна историја на болеста, одредени генетски состојби како што се семејна аденоматозна полипоза (ФАП), како и факторите како што се пушење, претерано консумирање алкохол, исхрана богата со црвено и преработено месо, низок внес на цели зрна, зеленчук и овошје, како и физичката неактивност – би требало да се разгледаат на почетокот на прегледот на помлада возраст, пишува британски „Мирор“.