До денеска беше можно да се влезе во Србија на два начина – со поседување на ПЦР тест не постар од 48 часа или по десетдневен карантин по влегување во земјата. Сепак, на денешната седница Кризниот штаб донесе одлука сите оние кои имаат потврда за ревакцинација да можат да влезат во земјата.

Опција 1: Негативен ПЦР тест

Влегувањето во Србија е можно со задолжителен негативен ПЦР тест кој не смее да биде постар од 48 часа. Овој тест ќе треба да го издаде референтната лабораторија на земјата од каде патниците доаѓаат, односно од каде влегуваат во Србија.

Ова правило најверојатно нема да важи за граѓаните на Албанија, на Босна и Херцеговина, на Бугарија, на Северна Македонија, на Црна Гора и на Унгарија, како и за српските државјани кои доаѓаат од тие шест земји, бидејќи според информациите на веб-страницата на Министерството за надворешни работи, тие може да влезат во земјата без негативен тест. Сепак, ова правило допрва треба да биде дефинитивно потврдено со подоцнежна одлука на српската влада.

Лицата кои доаѓаат од САД, наместо негативен ПЦР тест, им се признава негативен антиген ФИА рапид тест.

Доколку има задоцнување при влез во Србија, што не може да се припише на вина на патникот, но е последица на надворешен настан што не може да се предвиди, избегне или отстрани, како што е доцнење или одложување на лет, поаѓање на автобуси, возови и сл., тогаш тестот не може да биде постар од 72 часа при влез во Србија.

Ова не се однесува на малолетници до 12-годишна возраст, ако родителот со кој патуваат има негативен ПЦР тест. Исто така, оваа обврска ги ослободува граѓаните кои транзитираат, но не подолго од 12 часа во Србија, како и лицата кои се занимаваат со меѓународен транспорт и дипломатите.

Опција 2: Сертификат за вакцинација

Според изјавата на членот на Кризниот штаб, Зоран Гојковиќ, со Указ на Владата на Србија денеска ќе биде наведена опцијата со која влезот во земја би бил можен со потврда за целосна вакцинација, односно влез би бил можен за граѓани вакцинирани со две дози кои имаат уверение. Истиот услов би важел и за странците, а во овој случај влезот во Србија би бил можен без тест за ПЦР и без изолација.

– Комплетната вакцинација опфаќа две дози од вакцините на „Фајзер“, „Спутник V“ и на „Синофарм“. Бидејќи вакцината на „АстраЗенека“ моментно има една доза, се претпоставува дека една доза е еднаква на овие три вакцини за кои е потребна двојна имунизација, објасни Гојковиќ.

Тој посочи колку е важно луѓето да се вакцинираат и дека со зголемувањето на оние кои примале имунизација, бројот на новозаболени сигурно ќе започне да опаѓа.

Опција 3: Карантин

Државјани на Србија и странски државјани кои добиле привремен престој или постојан престој во земјата и кои сакаат да влезат од која било земја во светот, освен Албанија, Босна и Херцеговина, Бугарија, Северна Македонија, Црна Гора и Унгарија, без негативен тест за PCR или сертификат за вакцинација, ќе биде неопходен карантин или изолација. Ова важи и за луѓе кои доаѓаат од САД.

Оваа опција ќе се регулира при пасошка контрола, откако ќе се утврди дека граѓанинот нема потврда за вакцинација ниту негативен тест, ќе му се даде писмено известување – здравствено предупредување за обврската да се придржува до карантинската мерка – 10 дена дома од преминување на државната граница и се предупредуваат за обврска да се пријават на надлежната ковид клиника или територијално надлежен институт за јавно здравје во рок од 24 часа по преминувањето на државната граница со електронска апликација на електронската адреса: www.e-zdravlje.gov.rs