Повеќе автобуски линии во Куманово не сообраќаат, а не возат ниту ученичките автобуси. Кумановци реагираат дека се оневозможени да ги вршат своите секојдневни работи, и дека се принудени и да плаќаат такси-превоз за да стигнат на работа. Тврдењата одат дотаму дека некои од вработените со минимални плати во кожарската индустрија се откажале од одење на работа, затоа што трошоците за превоз им биле поголеми од заработката.

Група граѓани од Куманово се обратија во нашата редакција со молба да се актуализира ова прашање, затоа што градскиот превоз им е ускратен веќе трети месец, односно од 1 јануари. Според образложението што го добиле, во прашање е нереализиран тендер за распределба на линиите.

– Граѓаните не ги интересира кој и зошто стои зад овој проблем, туку ги интересира на најбрз можен начин да се најде разрешница и во овие кризни времиња да не се оптоварува домашниот буџет на граѓаните од Куманово – велат од Граѓанската иницијатива за враќање на јавниот превоз.

„Слободен печат“ се обрати во Општина Куманово од каде што побаравме одговор – зошто дел од линиите во јавниот превоз се укинати, но одговор не добивме. Но, на крајот на минатата година Општина Куманово излезе со соопштение:

„Ве известуваме дека од 1 јануари 2022 година поради истек на важноста на дозволи на превозниците за општински линиски превоз на патници на подрачјето на општината Куманово, ќе престане да се одвива јавниот превоз сè до завршување на постапката објавена со оглас за уредување општински линиски превоз на патници на подрачјето на општината, бр. 08-9194/2 од 14.12.2021 година, објавен од градоначалникот на Општина Куманово“.

Граѓаните од Куманово објаснуваат дека не само што не се реши проблемот со автобуските линии што гравитираат од и до најголемите населби во градот, туку и учениците останаа без школскиот автобус.

– Јас работам во средно училиште, кое е оддалечено 3 километри од мојот дом и патувам пеш секој ден или плаќам такси. Имам и две деца, кои се средношколци и исто така патуваат, за жал сите одиме во различен правец. За да проблемот биде уште поголем, од 17 март и на учениците од овие населби им е прекинат училишниот превоз. Сега врз учениците се врши притисок од наставниците и од класните раководители и им се советува да одат пеш во училиште, иако за нивниот превоз плаќа МОН – вели наставничка од средно училиште.

Нејзината колешка објаснува дека патува уште подолго.

– Како професори по одделенска настава, јас и моите колеги патуваме во село оддалечено 4,5 километри, односно јас 9 километри од моето место на живеење, населба Зелен Рид, од каде што исто така нема јавен превоз и одам пеш до центарот на градот, од каде што продолжуваме да патуваме со линиски автобус. Другите од моето семејство најчесто мора да користат такси-превоз бидејќи се постари лица што патуваат поради лични потреби и здравствени услуги и возрасни членови што треба да стигнат до работните места, средно училиште, факултет, библиотека итн. – вели наставничка од Куманово.

Според регулативата, на учениците им следува бесплатен јавен превоз доколку живеат подалеку од 2 километра. Од Министерството за образование, пак, се префрлаат дотации до општините во согласност со математички параметри и општините се должни од тие пари да обезбедат и превоз за учениците.

Децата добиле порака дека од утре ќе имаат училишен превоз

Кумановските ученици денеска добиле порака дека ќе имаат училишен автобус, велат од Граѓанската иницијатива за враќање на јавниот превоз во Куманово.

– Децата беа информирани дека училишниот автобус ќе продолжи да сообраќа на вообичаената релација. За јавниот сообраќај тоа не важи и ние, еве трет месец, продолжуваме да се соочуваме со тој проблем. Јавен превоз нема до големи населби и принудени сме кој како знае да се снаоѓа – велат од Граѓанската иницијатива.