Есенската кошница заврши, а утре се симнуваат натписите „помалку трошоци, повеќе за тебе“. Трговците не очекуваат нови цени, оти речиси 40 отсто од добавувачите воошто не дале никаков придонес на владината мерка (читај воопшто не ги намалија цените). Иако неволно и министерот за економија и труд, Бресар Дурмиши призна дека кај некои производи намалувањето на цените било помало, или воопшто го немало како кај лебот, маслото за јадење и млекото, додека кај други производи било значително поголемо како кај месото, зеленчукот, сирењето и кашкавалот, но и со нивното намалување од 30 до 40 денари, тие производи се прескапи за обичните граѓани. Се на се „евтинијата“, која траеше еден месец, даде минимален ефект на заштеда од 57 денари, а тоа според владините претставници било поради поскапената облека!?

-Она која што е важно да се каже е дека целокупната синдикална кошничка се има намалено за 57 денари, но доколку ги видите нејзините контрибутори, ќе видите дека поскапувањето односно драстичното не намалување, не доаѓа заради мерките кои што се од владата, току заради поскапување на цената на облеката, додека оние мерки кои што се превземаа со проширувањето на позитивната листа на лекови имаат дадено резултат – рече минатата недела, пратеникот Бојан Стојановски од ВМРО-ДПМНЕ.

Според списокот со деталните маржи на Сојузот на синдикатите, поевтинување имало кај брашното, тестенините, оризот, урдата, кашквалот, поголемиот дел зеленчук и овошје, млечното чоколадо. Од друга, евидентно поскапување имало кај зејтинот, млекото, јогуртот, путерот. Истите цени останале кај сирењето, јајцата, месото, медот…

Во дел од маркетите, менаџерите за „Слободен печат“ велат дека се уште не добиле нови ценовници, но ништо чудо тие да стигнат утре.

-Добивме инструкции да ги тргнеме етикетите, а никој не знае дали ќе добиеме нови ценовници. Она што е јасно е дека мора да водиме строга сметка за тоа колку производи порачуваме, оти ако не ни се продадат ќе мора да ги фрлиме – вели раководителка на еден голем скопски маркет.

Во меѓувреме, дуќаните пливаат во акции и се повеќе производи се намалуваат за да не им истече рокот. Чоколади, кекси, конзервирани и хемиски производи, млеко и млечни производи се продаваат за пониски цени и до 50 отсто, а тоа само го потврдува фактот дека нивните маржи досега биле превисоки и слабо се продавале.

Владината мерка, ќе продолжи и во наредниот период како божиќна, рамазанска и велигденска кошница, а производите во нив ќе бидат поразлични од есенската, веќе потврдија од Министерството за економија и труд.

Се враќаат и старите цените на бурекот?

Дел од пекарите кои ниту ја намалија, а и не ја зголемија цената од 70 денари за четврт, велат дека не знаат дали од утре ќе го продаваат поскапо. Овој традициционален појадок исто така беше дел од есенската кошница, а пазарните инспектори ги чешлаа и бурекџилниците.

-Нашата цена остана иста во текот на овој месец, а пазарните инспектори од нормативите видоа дека одиме со маржа од 7 до 10 отсто. Што ќе биде од утре не знаеме – ни рекоа во една пекарница во центарот на Скопје.

Последното поскапување на бурекот се случи пред два месеци, кога пекарите без најава почнаа да продаваа еден четврт со повисока цена за 10 денари. Во дел од поголемите пекарници, кои работат 24 часа, популарната четвртина наместо за 80, стигна и до 90 денари, додека ексклузивните видови отидоа и до 100 денари. Најголем скок на цената на бурекот се случи во 2022 година, кога од 50 денари за четврт, тој скокна на 70 денари.