Тревис Скот во четвртокот беше ослободен од какви било кривични пријави за фаталниот фестивал „Астроворлд“, на кој 10 луѓе го загубија животот, а стотици беа повредени, пренесува „Њујорк пост“.

Адвокатот на 32-годишниот рапер, Кент Шафер, изјавил за „Њујорк пост“: „Денешната одлука на окружниот обвинител на округот Харис го потврдува она што го знаевме цело време, дека Тревис Скот не е одговорен за трагедијата на Астроворлд“.

Шафер изјавил дека одлуката е „конзистентна“ со извештаите на медиумите и владата „кои целосно ја ставија одговорноста за безбедноста на настаните на организаторите, операторите и техничарите, а не на изведувачите“.

Тој продолжи: „Додека трпеливо ја чекаше одлуката на окружниот обвинител да не поднесе обвинение, Тревис Скот беше неправилно и погрешно критикуван, и покрај тоа што тој три пати го прекина шоуто и не беше свесен за настаните додека тие се одвивале“.

Големата порота во Тексас била на седница поголемиот дел од денот, за да разговара за можните обвиненија против Скот.
Полицискиот оддел во Хјустон одржа прес-конференција во четвртокот за дополнително да објасни како дошле до овој заклучок.

„Големата порота утврди дека не се случило никакво кривично дело и дека ниту едно лице не е кривично одговорно“, рече окружниот обвинител на округот Харис, Ким Ог.

Скот претходно тврдеше дека немал поим дека повеќе посетители биле газени и онесвестени во толпата додека тој настапувал на настанот во ноември 2021 година.

„Астроворлд“ резултираше со над 300 граѓански тужби против Скот и организаторите на настаните, иако никој не е кривично обвинет.