Агенцијата за иселеништво на 27 мај ги одржа третите „Литературни средби“ на кои се промовираа делата и писателите кои творат и живеат во странство. За активно учество на средбата се пријавија писатели од иселеништво и од Македонија, со цел вмрежување, размена на искуства и дискусии околу предизвиците со кои се среќаваат во средините каде што живеат и работат.

Поздравно обраќање имаа директорот на Агенцијата за иселеништво Горан Ангелов и претседателот на Друштвото на писателите Живко Грозданоски, кои им посакаа топло добредојде и успешна средба, со желби манифестацијата да добие традиционален карактер и да прерасне во заеднички проект.

На настанот се претставија повеќе учесници, писатели од иселеништво, меѓу кои Зоран Карапанчев и Весна Карапетрова од Канада, Емилија Тодорова, Владо Јаневски, Нове Младеновски и Оливера Јовановска од Австралија, Светлана Далевска од Германија, Ана Илијоска Богиќ и Искра Пенева од Србија, Мирјана Мајиќ од Хрватска, Марјан Смоларски од Швајцарија и Лилјана Стоилковска, Александра Велинова, Митко Гогов и Ставре Џиков од Македонија.

На настанот директорот Ангелов на писателот Владо Јаневски од Сиднеј му ја врачи наградата „Стојан Христов“ за најдобра книга поезија, која Агенцијата ја доделува при „Струшки вечери на поезијата“, а Јаневски ја доби во август 2024 година. Настанот го водеше Билјана Костова.