Работата со деца уште од најрана возраст, односно промена на начинот на воспитување, но не и промена на традиционални вредности, ниту воспитување кое пркоси на семејните вредности, туку воспитување кое носи прифаќање, поддршка и еднаквост е клучното решение кое ќе ја намали дискриминацијата, посочи министерката за труд и социјална политика Јованка Тренчевска во денешното обраќање на конференција на Обединетите нации за 2023 година „Слобода, еднаквост и правда за сите“.

Според Тренчевска, во време кога се развива вештачката интелигенција и во време кога е во подем технолошкиот развој, општеството сè уште нема доволно капацитет да живее во духот на толеранцијата и прифаќањето. Таа ги спомена и одговорностите на Министерството за труд и социјална политика и за неговите надлежности истакнувајќи дека еднаквоста, недискриминацијата и социјалната правда се приоритет.

– Како Министерство кое е одговорно за подобар квалитет на живот и добросостојба на граѓаните го донесовме Законот за спречување и заштита од дискриминација, сепак законската рамка е она коешто го одредува текот на општествениот развој или подобро кажано насоката по која ќе се развива општествената свест. Во овој закон се забранува секаква дискриминација во делот на работата и работните односи, затоа што секој еден кој е граѓанин на нашата држава има право да биде економски независен и да креира живот којшто е по негова мерка. Забрана за дискриминација во образованието, науката и спортот, социјалната заштита, домувањето, јавното информирање и медиумите, пристапот до добра и услуги – додава таа.

Министерката истакна дека главните решенија на предизвикот со дискриминацијата е подигање на свеста и негување на култура на почитување уште од најрана возраст.

Конференцијата на Обединетите нации за 2023 година „Слобода, еднаквост и правда за сите“ има за цел да промовира дијалог со цел да се изнајдат подобри начини за справување со дискриминацијата, погрешните информации, дезинформациите, лажните вести и говорот на омраза помеѓу претставници од Собранието.