Доколку ви треба некоја информација, сакате да прашате нешто или да пријавите некаков проблем во вашата општина, навистина ќе се изнамачите за да најдете контакт со раководителот на секторот што ви е потребен или со некој друг надлежен. До градоначалниците пак, најтешко се стигнува. Речиси сите имаат отворени денови за граѓаните, со закажување однапред, но на нив не можат да присуствуваат кога ним им е потребно туку кога ќе дојдат на ред за средба со градоначалникот. Ретки се оние на кои жителите во нивната општина можат да им свртат на телефон.

Но, првите луѓе на општините се чини забораваат дека се таму каде што се затоа што граѓаните ги избрале, а дека илјадниците вработени во општинските и во градската администрација се плаќаат од џебот на граѓаните и дека треба да работат за нив. Тоа значи, дека треба да бидат достапни, јавно да биде објавен начинот на комуникација со нив, а не нивните телефонски броеви да се чуваат како најголема државна тајна и граѓаните да не знаат каде да се јават доколку имаат некаква мака.

Советниците од „Шанса за Центар“ неодамна до Советот на Општина Центар поднесоа предлог-точка во која бараа Советот да ја задолжи Општината да објави контакти од своите сектори, раководителите и вработените за граѓаните да можат да се информираат за сите прашања што се од нивен интерес. На седницата градоначалникот Горан Герасимовски објасни дека на веб страната на Општината има објавено список на сите вработени со нивните телефони и и-мејл адреси и посочи дека е лесно да се критикува, но треба прво да се провери. Сепак од „Шанса за Центар“ тврдат дека списокот бил објавен еден час пред седницата на Советот.

Центарци кои имаат некаква потреба треба да се потрудат да го најдат овој список. На веб – страницата на општината треба да одат на „профил на општината“, па да изберат „информации од јавен карактер“, па таму ќе го пронајдат и списокот на вработени и нивните контакти.

Најлесно се наоѓаат контактите на Општина Карпош, каде на насловната страна треба да се „кликне“ на „отворени податоци“ и веднаш се покажува списокот на вработени во администрацијата со нивните телефонски броеви и мејлови, но и разни други документи и регистри кои можат да бидат корисни за карпошани.
Аеродромци пак на веб – страницата на Општина Аеродром треба да одат на „администрација“, па на „структура“ и потоа најдолу, откако ке ги исчитаат сите сектори и нивни надлежности, има документ (кој треба да се „симне“), односно список на сите вработени во локалната самоуправа.

Контактите со вработените во Општина Ѓорче Петров, но само нивните и-мејл адреси, можат да се најдат на нејзината веб – страница во категоријата „документи“, па потоа во „отворени податоци“.
Општина Чаир во категоријата „администрација“ ги има објавено контактите со раководителите на секторите, но на нејзината веб- страница е овозможено преку апликацијата „месинџер“ да се поставуваат прашања и да се добие одговор во секое време.

На сајтот на Општина Бутел не може да се најде ниту еден контакт ниту имиња на раководители на сектори. Бутелчани што имаат мака можат само да испратат порака директно на веб страницата или на општинската електронска адреса и да се надеваат дека ќе добијат одговор. Слично е и во Општина Гази Баба, каде може да се испрати порака и во избраниот сектор. Но кој работи таму и кому се обраќаат во пораките останува загатка за жителите на Гази Баба.

Таков проблем немаат жителите на Кисела Вода, каде на општинскиот сајт во категоријата контакти ги имаат имињата на одговорните лица по сектори заедно со телефонските броеви и електронски адреси. Слично е и на веб – сајтот на Општина Шуто Оризари, каде на раководителите на секторите граѓаните можат само да им испратат мејлови, а во Сарај да се обратат со директна порака на веб – сајтот или на електронската адреса на општината.

Граѓаните кои сакаат нешто да прашаат во Град Скопје, на официјалната страница во категоријата „Град Скопје“ треба да изберат „администрација“, каде имаат преглед на сите сектори и нивните надлежности. Потоа, со „кликнување“ на секторот кој им е потребен можат да најдат контакти и од раководителот во збраниот сектор. Сепак скопјани со Град Скопје можат да комуницираат преку електронската адреса [email protected] да пријавуваат проблеми и да поднесуваат барања. Од Градот велат дека досега на оваа адреса се поднесени околу 2300 барања од граѓаните, а како што тврдат решени биле околу 2000.