Кинескиот претседател Си Џинпинг разговараше по телефон со американскиот претседател Доналд Трамп, во услови на затегнати билатерални односи околу трговските спорови. Телефонскиот повик, кој доаѓа по вчерашниот разговор меѓу Трамп и рускиот лидер Владимир Путин, се одржал на барање на американскиот претседател, пренесе Ен-би-си њуз.

Трамп објави статус на својата социјална мрежа, во кој наведува дека главната тема на разговорот била трговијата.

„Тукушто завршив многу добар телефонски разговор со претседателот Си од Кина, за време на кој разговаравме за некои детали од нашиот неодамна договорен и потпишан трговски договор. Разговорот траеше околу час и половина и заврши многу позитивно за двете земји. Веќе не треба да има никакви прашања поврзани со сложената ситуација околу ретките минерални производи. Нашите тимови наскоро ќе се сретнат на локација што сè уште не е утврдена. Соединетите Американски Држави ќе бидат претставени од секретарот за финансии Скот Бесент, секретарот за трговија Хауард Лутник и амбасадорот на трговскиот претставник на САД, Џејмисон Грир“, напиша Трамп во објавата.

„За време на разговорот, претседателот Си љубезно нè покани мене и првата дама да ја посетиме Кина, а јас ја вратив поканата. Како претседатели на две големи нации, двајцата со нетрпение го очекуваме тој состанок. Разговорот беше речиси целосно фокусиран на ТРГОВИЈАТА.
Немаше разговор за Русија и Украина, ниту за Иран. Навремено ќе ги информираме медиумите за датумот и локацијата на претстојниот состанок. Ви благодарам за вашето внимание“, додаде Трамп.

Трамп: Путин во телефонски разговор ми рече дека ќе мора да одговори на украинските напади