Американскиот претседател Доналд Трамп во петокот изјави дека неговото трпение со рускиот претседател Владимир Путин се истрошува, но не најави нови санкции во врска со војната во Украина, објави Ројтерс.

На прашањето дали му се истрошило трпението со Путин, Трамп рече:

– Да. На некој начин се истрошува и тоа многу брзо. Ќе мора да настапиме многу, многу силно.

Трамп рече дека санкциите кон банките и нафтата се една од опциите, како и царините, но дека и европските земји мора да учествуваат.

– Но, јас тоа веќе го направив. Направив многу – изјави Трамп.

Тој посочи дека Индија – еден од најголемите купувачи на руска нафта – се соочува со 50 отсто царина на својот извоз во САД.

– Тоа не е лесна работа. Тоа е голема работа и предизвикува јаз со Индија. И запомнете го ова: ова е проблем на Европа многу повеќе одошто наш проблем – изјави тој во програмата „Фокс енд френдс“.