Поранешниот американски претседател Доналд Трамп изјави дека не заработува многу од сопствените социјални медиуми, проценувајќи ја нивната вредност помеѓу 5 и 25 милиони долари, според неговиот финансиски извештај објавен вчера, објави Асошиетед прес.

Тој поседува околу 90 проценти од Трамп Медиа и Технолошка групација, но вели дека заработил помалку од 201 долар од тоа. Тој, исто така, тврдеше дека заработил помеѓу 100.000 и 1 милион долари од серија картички за дигитално тргување што ги објави минатиот декември, прикажувајќи го како лик од цртан филм, вклучувајќи астронаут, каубој и суперхерој.

Декларацијата, објавена од Федералната изборна комисија, е прв преглед на финансиската состојба на Трамп откако тој ја напушти Белата куќа и започна неколку деловни потфати, пренесе БТА.

Магнатот за недвижности и реалити ѕвезда ја лансираше платформата Трут Соушал во 2022 година, една година откако неговите сметки на Фејсбук, Твитер и Јутјуб беа блокирани по немирите на 6 јануари 2021 година во Капитол.

Иако му беше дозволено да се „врати“ на овие социјални медиуми, тој се потпира на својата социјална мрежа за споделување пораки со своите поддржувачи, особено по започнувањето на неговата кампања за претседателските избори во 2024 година.

Од сите претседателски кандидати се бара да ја објават својата финансиска состојба. На Трамп, републиканец, му беше одобрено одложување, со понатамошни одложувања кои ризикуваат парична казна.