Претседателот на САД, Доналд Трамп на својата социјална мрежа „Трут соушл“ денеска објави дека Русија и Украина размениле воени заробеници.

Тој им честита на двете страни на успешните преговори, и истакна дека размената би можела да биде вовед во позначаен напредок кон мирот.

– Штотуку заврши голема размена на затвореници помеѓу Русија и Украина. Наскоро ќе стапи во сила. Честитки до двете страни за овие преговори. Дали ова може да доведе до нешто големо???- посочи Трамп.

Според украински медиуми, разменети се околу илјада воени заробеници, што е најголема размена од почетокот на руската инвазија врз Украина во 2022 година.

Размената на воени заробеници е договорена минатата недела на преговорите во Истанбул, на кои Киев бараше и привремен прекин на огнот, но Москва одби.

Русија сè уште не ја коментираше размената, но потврди дека е постигнат договор.