НАСА денеска го објави првиот бран отпуштања, вклучувајќи го и нејзиниот главен научник, како дел од драстичните кратења на федералните трошоци што ги бара Доналд Трамп.

Првите намалувања се однесуваат на 23 вработени во американската вселенска агенција, изјави портпаролот на НАСА, истакнувајќи дека ќе следат уште повеќе.

Во оваа прва фаза, НАСА го отпушти својот истакнат главен научник и виш советник за климата, Кетрин Калвин. Истакнатиот истражувач, кој беше назначен во 2022 година од Џо Бајден, придонесе за многу важни климатски извештаи на ОН.

Кетрин Калвин и многу други американски научници веќе беа спречени кон крајот на февруари да присуствуваат на експертскиот состанок на ОН за климата што се одржува во Кина.

„За да ја оптимизира својата работна сила и со извршна наредба, НАСА започнува постепен процес, наречен „РИФ“, за намалување на својот персонал“, изјави портпаролката на американската вселенска агенција Шерил Ворнер.

„Мал број луѓе беа известени на 10 март дека се засегнати од овој процес. Овие вработени можат да изберат да учествуваат во програма за предвремено пензионирање, доколку ги исполнуваат условите, или да го следат процесот на РИФ“, појаснуваат од агенцијата.

НАСА досега ги избегнуваше драстичните намалувања што ќе ги погодат другите американски федерални агенции благодарение на интервенцијата во последен момент на американскиот милијардер Џаред Исакман, кој беше избран од Доналд Трамп да стане следниот администратор на НАСА.

Откако се врати во Белата куќа, Доналд Трамп даде многу најави насочени кон научната заедница: големи буџетски кратења, отпуштање на стотици федерални вработени одговорни за климата или здравјето, цензура на одредени теми во субвенционираните истражувања итн.

НАСА игра клучна улога во истражувањето на климата, управувајќи со флота сателити за набљудување на Земјата, спроведувајќи студии за атмосферата и земјиштето и обезбедувајќи им на научниците и на јавноста слободен пристап до податоци.