Американскиот претседател Доналд Трамп денес објави дека наскоро постхумно ќе му го додели Претседателскиот медал за слобода на инфлуенсерот и десничарски активист Чарли Кирк, кој беше убиен во среда во обид за атентат во Јута.

Зборувајќи на комеморацијата во Пентагон по повод 24-годишнината од терористичките напади од 11 септември 2001 година, Трамп рече дека Кирк бил „гигант од својата генерација, застапник на слободата и инспирација за милиони луѓе“, пренесуваат американските медиуми.

„Нашите молитви се со неговата прекрасна сопруга Ерика и неговите прекрасни деца, тие се фантастични луѓе. Многу ни недостига, но не се сомневам дека гласот на Чарли и храброста што ја донесе во срцата на безброј луѓе, особено млади луѓе, ќе продолжат да живеат“, рече Трамп.

Зборувајќи за нападите во 2001 година, тој потсети дека тогаш беа убиени 2.977 луѓе.

„Денес, како нација, го обновуваме нашиот свет завет никогаш да не го заборавиме 11 септември 2001 година. Во Америка, ние прифаќаме удари, но никогаш не се поклонуваме. Крвавиме, но не се поклонуваме и му пркосиме на стравот, ги трпиме огновите и излегуваме од сите неизвесности посилни, погорди и поголеми од кога било досега“, рече Трамп.

Осврнувајќи се на неодамнешното преименување на Министерството за одбрана на Соединетите Американски Држави во Министерство за војна, Трамп рече дека „сите го сакаа тоа“.

„Ако ги нападнете Соединетите Американски Држави, ќе ве најдеме. Ќе ве смачкаме без милост и ќе триумфираме без прашање, и затоа го нарековме поранешното Министерство за одбрана Министерство за војна“, рече Трамп.