Претседателот на Соединетите Американски Држави, Доналд Трамп, денес изјави дека нема нова порака за претседателот на Русија, Владимир Путин, и дека чека на неговата одлука.

„Немам порака за претседателот Путин. Тој го знае мојот став за ова прашање и ќе донесе одлука на еден или друг начин. Каква и да е неговата одлука, ние или ќе бидеме задоволни или незадоволни, а ако сме незадоволни, ќе видите што ќе се случи“, изјави Трамп пред новинарите во Белата куќа, според Ројтерс.
Трамп, исто така, оцени дека воената парада во Кина била „убава церемонија“, но додаде дека САД требало да бидат споменати во говорот.

„Мислам дека беше убава церемонија, многу импресивна. Го гледав говорот синоќа. Претседателот Си ми е пријател, но мислам дека Америка требаше да биде спомената бидејќи многу ѝ помогнавме на Кина“, рече Трамп.

Во исто време, американскиот претседател потврди дека американските сили ќе останат во Полска и дека е подготвен да испрати повеќе војници доколку биде побарано.

Трамп им изјави на новинарите за време на средбата со полскиот претседател Карол Навроцки.

Иако можноста за повлекување на американските трупи од Европа често се споменува уште од почетокот на мандатот на Трамп, Трамп нагласи дека трупите во Полска ќе останат.