Американскиот претседател Доналд Трамп најави дека во рок од 24 часа ќе воведе значително зголемување на царините за увоз од Индија, обвинувајќи ја земјата дека продолжува да купува руска нафта, и покрај повеќемесечните предупредувања од Вашингтон.

„Се согласивме на 25 проценти, но мислам дека ќе го зголемам тоа многу значително во следните 24 часа, бидејќи тие купуваат руска нафта. Тие ја снабдуваат воената машина. Ако ќе го сторат тоа, нема да бидам среќен“, изјави Трамп во интервју за CNBC.

Од Индија реагираа со остар тон, оценувајќи ги заканите на Трамп како неоправдани. Владата во Њу Делхи најави дека ќе продолжи со трговските преговори со САД со цел обезбедување поповолни услови.

Дополнително, индиските власти разгледуваат можност за зголемен увоз на природен гас од САД, како и набавка на американска комуникациска опрема и злато.

Во истото интервју, Трамп ја обвини Индија дека го отежнува пристапот до американски производи и ја критикуваше нејзината поврзаност со групата БРИКС, која вклучува земји што често имаат различни позиции од САД во глобалната политика.