САД депортираа околу 200 осомничени членови на венецуелската банда Трен де Арагва во Ел Салвадор, каде што беа одведени во затвор со максимална безбедност. За оваа депортација, Доналд Трамп се повика на закон од 1798 година кој беше донесен за време на војна.

Откако групите за човекови права поднесоа жалба против повикувањето на Законот за странци и бунт, последен пат користен за време на Втората светска војна за приведување Јапонци, федералниот судија нареди 14-дневен прекин на депортациите. Не е појаснето дали трите авиони со членови на бандата, која Вашингтон ја опишува како „терористичка организација“, веќе полетале пред објавувањето на судската одлука или не.

„Денеска во нашата земја пристигна првата група од 238 членови на венецуелската криминална организација Трен де Арагва. Тие веднаш беа префрлени во Центарот за притвор за терористи, на обновлив период од една година, објави салвадорскиот претседател Најиб Букеле на Икс.

Today, the first 238 members of the Venezuelan criminal organization, Tren de Aragua, arrived in our country. They were immediately transferred to CECOT, the Terrorism Confinement Center, for a period of one year (renewable).

The United States will pay a very low fee for them,… pic.twitter.com/tfsi8cgpD6

— Nayib Bukele (@nayibbukele) March 16, 2025

„Благодарам Ел Салвадор“, одговори Доналд Трамп на платформата Truth Social, кој ја потпиша наредбата за депортација во петокот, повикувајќи се на Законот за странци и бунт од 1798 година, но соопштението беше објавено вчера.

Законот од 1798 година и „терористичката организација“ Трен де Арагва

Законот, кој му дозволува на американскиот претседател во време на војна да одлучува за апсење или депортација на државјани на непријателски земји, досега е користен само три пати, главно за време на двете светски војни.

Во февруари, администрацијата на Доналд Трамп ја прогласи Трен де Арагва за „терористичка организација“ која претставува закана за безбедноста на Соединетите држави.

Во налогот за депортација, Трамп наведува дека Трен де Арагва „води неконвенционална војна против територијата на Соединетите држави, директно и под раководство, нелегално или на друг начин, на режимот на Мадуро.

Одлуката ги прави сите членови на бандата Трен де Арагва „кандидати за итно апсење, притвор или депортација“.

Како одговор, Каракас ја осуди одлуката на американската влада која „безобразно и неправедно ја криминализира имиграцијата на Венецуела“.

Организацијата за човекови права ACLU и Democracy Forward побараа од судот во Вашингтон, да ги забрани депортациите, тврдејќи дека законот од 1798 година не бил наменет да се користи во време на мир.

Вчера федерален судија нареди 14-дневен прекин на депортацијата. Одлуката беше критикувана од министерката за правда, Пем Боди, за „загрозување на јавноста и на органите на прогонот“.

Американскиот државен секретар Марко Рубио денеска појасни дека заедно со членовите на Трен де Арагва, САД депортирале и 23 членови на МС-13 во Ел Салвадор за да се соочат со судење.

Бандата Трен де Арагва е создадена во 2014 година во затворот Токорон во Венецуела, во провинцијата Арагва. Таа е вклучена во убиства, киднапирања, грабежи, трговија со дрога, проституција, изнуда и трговија со луѓе.

Нејзините активности се протегаат во многу земји на американскиот континент, вклучувајќи ги САД, Колумбија , Чиле и Перу , според разузнавачките податоци.