Во објави на својата платформа „Трут соушл“, американскиот претседател Доналд Трамп се заложи за затворање на телевизиските мрежи Ен-би-си и Еј-би-си, правдајќи го тоа со нивната наводна пристрасност.

Трамп напиша дека и покрај неговата висока популарност, овие канали објавуваат „97 отсто лоши приказни“ за него и известуваат неправедно за републиканците, пренесува Ројтерс.

Претседателот на Федералната комисија за комуникации, Брендан Кар, републиканец назначен од Трамп во 2017 година, сè уште не се огласи околу овие објави на претседателот на државата.

Трамп е во постојан конфликт и со други медиуми чие известување не му се допаѓа. Најново, весникот „Волстрит џурнал“ доби забрана да патува со владин авион поради напис за контактите на Трамп со осудениот сексуален престапник Џефри Епстин.

Новинската агенција АП, пак, сè уште нема дозвола да лета со претседателскиот авион, откако одби да го користи новото име што Трамп му го даде на мексиканскиот залив – „Американски залив“.