Во тешка сообраќајна несреќа која се случила попладнево во Албанија, загинало осумгодишно девојче од Македонија, а петмина луѓе се повредени.

„Несреќата се случила на патниот правец Елбасан-Пеќин, кај селото Паулеш. Во несреќата учествувал автомобил „Голф” со гостиварски регистарски таблички, управуван од македонската државјанка Т.Б., кој се движел од Елбасан кон Пеќин и автомобил управуван од А.Х., жител на албанскиот град Каваја“, пишуваат локалните медиуми, повикувајќи се на полицијата.

Жената-возач, според полициски извори, изгубила контрола врз „автомобилот“, кој директно се судрил со другиот автомобил, по што „Голфот“ завршил на банкината.

Повредена е Т.Б.- мајка на загинатото девојче, нејзината 11-годишна ќерка, како и А.Х. и двајца сопатници од неговиот автомобил. Тие се пренесени во регионалната болница во Елбасан и според последните информации, не се во животна опасност.

Причина за несреќата е влажниот коловоз и неприлагодена брзина на движење на автомобилот со македонски ознаки, велат од полицијата. Според медиумите, местото каде што се случила несреќата е една од неколкуте црни точки на оваа делница.