Поранешниот капитен на Рома можеше многу лесно да има и втор клуб во неговата професионална кариера.

Франческо Тоти, легендата на римската „волчица“, вели дека беше многу блиску да потпише за екипата на Реал Мадрид.

– На крајот од сезоната 2003/2004 ми истекуваше договорот со Рома. Имаше несогласување со тогашниот претседателот Франческо Сенси кој можеше да направи уште повеќе за мене. Имав намера од 80 проценти да одам во Реал Мадрид. Рома не беше на најдоброто ниво, а Шпанците беа подготвени да платат многу за моите услуги, договор вреден околу 25 милиони евра. Сè, освен капитенската лента на Раул, кој заработуваше најмногу и беше симболот на тој тим. Трансферот скоро беше пред реализација, ме охрабруваше и мојата сопруга Илари, ме поддржуваше во одлуката за потпишам за Реал – рече Тоти за „Либеро“.

Одлуката да остане во Рома е донесена од срце, истакнува поранешниот италијански репрезентативец.

– Мислев на навивачите, семејството и пријателите. Сакав да направам нешто различно од тоа што фудбалерите генерално го прават. Многумина заминуваат во Барселона, Реал, Баерн. Јас сум поразличен, сето време носев само еден дрес – додаде Тоти.

Со Рома успеа еднаш да ја освои Серија А, и по двапати Купот и Суперкупот на Италија.