Генералниот секретар на владата Игор Јанушев и министерот за внатрешни работи Панче Тошковски ги отфрлија обвинувањата дека поседуваат имот кој не го пријавиле во анкетниот лист, односно имот кој е стекнат под сомнителни околности, како што тврди СДСМ.

Портпаролката на СДСМ, Богданка Кузеска го обвини Тошковски дека поседува стан и деловни простории во зграда во Центар за кои не е познато дали ги пријавил во анкетнитот лист, тој вели дека нема скриен имот. Изјавата за имотната состојба ја доставил до Антикорупциската комисија уште на 4 јули, вели Тошковски.

„Одговорно тврдам дека надвор од она што е наведено во изјавата за имотната состојба не поседувам ништо друго. Ги повикувам институциите детално да го проверат мојот имот, но и имотот на секој актуелен и поранешен функционер, особено на оние кои целиот свој живот се на товар на државниот буџет. Упатувам порака до СДСМ да престане со лаги и манипулации. Транспарентноста и одговорноста се клучни за градење на доверба меѓу институциите и граѓаните. Време е вистината да излезе на виделина“, напиша Тошковски.

Според СДСМ, клучно прашање е како се поврзани подарокот на Јанушев од 325 илјади евра и имотот на Тошковски.

„Каков заеднички бизнис имале овие двајца? Дали преку шема на давање подароци овие двајца прикриваат некаква бизнис-зделка која јавноста не треба да ја знае? Имаат ли скриени бизниси кои на крај завршуваат со подароци во имоти вредни над 300 илјади евра?“, рече Кузеска.

И генералниот секретар Игор Јанушев се огласи на Фејсбук велејќи дека не постои никакво подарено земјиште туку има погрешно внесени податоци за што веќе е направена и корекција од негова страна.

„Ве пуштав да се излизгате… прво да изнесе лаги еден сдсовски сателит и советник на криминалното СЈО, во исто време шарен револуционер и познат лажен патриот, па потоа да се надоврзе една пара партиска структура и на крај да излезе изворот на таквите дезинформации, партијата која ја води неврохирургот на Заеви или како што во СДС го викаат малиот на Зоки, Венко Филипче. Па да ви одговорам по ред. Прво, СДС вели дека имотот на анкетниот лист е енормно зголемен. Тоа не е вистина и е комплетна лага. Не само што не е зголемен, туку е и двојно помал доколку се направи споредба со тој од 2017. година. Второ, не постои никакво подарено земјиште…има погрешно внесени податоци за што веќе е направена и корекција од моја страна. Истиот имот кој во моментов го поседувам, го поседував и во минатото и доколку било што беше проблематично владата на СДС и ДУИ имаше и повеќе од доволно време да постапува. Трето, 7 години бандитите на ДУИ и СДС беа на власт. 7 години водеа политички процес и хајка врз мене и тоа за непостоечки случај за набавка на автобуси, и кога можеа за тоа да водат случај, што мислите колку пати ќе бев затворен доколку е вистина она што сега го говорат?“, напиша Јанушев.