Министерот за внатрешни работи Панче Тошковски денеска реагира и се става во одбрана на тендерот за униформи за специјалните единици кој го доби женско модно студио од Битола со двајца вработени и фирма формирана 20 дена пред распишувањето на тендерот. Сторијата ја објави „360 Степени“ после што следуваа партиски реакции од СДСМ и од „Левица“ кои засебно изразија сомнеж за неправилности и договорени набавки на овие полициски униформи. Во прилогот на „360 Степени“ беше јасно наведено дека се работи за рамковна спогодба од 2.1 милиони евра, што значи дека тоа е максималната сума што МВР ќе ја искористи во наредните 3 години при набавката на униформите на специјалците од битолското женско модно студио. Теоретски, можно е да не се искористи целата сума, туку само дел од неа, а можно е да не се набави ниту една униформа.

Министерот Тошковски во својата реакција на „Фејсбук“ вели дека нема ништо спорно во тоа што тендерската документација односно условите кои биле поставени при тендерот, биле такви што на нив можеле да се јават и мали фирми. Клучни според него биле мострите што фирмите добитници ги доставиле а кои поминале процес во акредитирана лабораторија.

Во однос на обвинувањата поврзани со тендерот за набавка на униформи за специјалните единици, важно е граѓаните да ги знаат фактите, јасно, прецизно и без политички манипулации. Најпрво, важно е да се истакне дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години. Разликата е клучна, самата рамковна спогодба не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите, пишува Тошковски.

Осврнувајќи се на една од главните „замерки“ – зошто не се барало долгогодишно искуство или поголем број вработени, Тошковски ја објаснува логиката на МВР.

Нашата логика е јасна и е исклучиво во интерес на државата, а тоа е поттикнување на конкуренцијата и фер пристап. Премногу строги критериуми често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи. Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби. Наместо само на историјата на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори, објаснува Тошковски.

Покрај квалитетот, клучен фактор според него била и цената.

Анализата покажа дека разликата помеѓу највисоката и најниската понудена цена во постапката е 14,4 проценти за дел 1 и 27,9 проценти за дел 2 од набавката, што ја потврдува конкурентноста на тендерот и добиените поволни цени. За да се обезбеди дополнителна сигурност, за секоја поединечна нарачка се бара банкарска гаранција од 5% од износот на таа конкретна нарачка. Ова е дополнителен механизам за заштита на буџетските средства и осигурување на квалитетот и навремената испорака. Целата постапка беше максимално транспарентна, со продолжување на рокот за поднесување понуди, од 32 на 55 дена, за да се обезбеди фер шанса за сите. Дополнително, постапката беше предмет на задолжителна управна контрола од Бирото за јавни набавки, при што не беа најдени никакви неправилности. Јасно е дека нападите кои се шират овие денови не се резултат на вистинска загриженост за законитоста, туку обид за политичка конструкција и дефокус од вистинските реформи. Наместо идеи и решенија, повторно гледаме координирани напади, дезинформации и обвинувања без основа, сè со цел да се фрли сенка врз процеси кои за првпат се водат со целосна транспарентност и отчетност. Кога СДСМ и Левица, партии со спротивставени реторики и интереси, ќе се најдат на иста страна, тоа не е коинциденција, туку потврда дека сме на прав пат.
МВР под мое раководство ќе продолжи да работи професионално, отчетно и во целосна согласност со законите, со јасен фокус на безбедноста и градењето систем што ќе обезбеди ред, сигурност и доверба во институциите, вели министерот за внатрешни работи.