Американската актерка Тори Спелинг, позната по улогата на Дона Мартин од серијата „Беверли Хилс, 90120“, посвети емотивна објава на починатата Шенон Доерти, која го толкуваше ликот на Бренда Волш. Шенон почина на 53-годишна возраст по долга борба со ракот.

Сега, Спелинг сподели неколку заеднички фотографии и се осврна на нивното долгогодишно пријателство полно со подеми и падови.

„’Кој ги е*е…’ би коментирала Шенон ако ѝ кажев колку притисок чувствувам да успеам на социјалните мрежи да резимирам 36 години познанство и тагата што ја чувствувам поради пламенот што прерано изгасна“, започна Тори во објавата.

Како што напиша актерката, ја запознала Шенон кога имала само 15 години.

„Бев ќерка на шефот без сопствен глас, а таа беше ѕвезда со силен глас. Ме зеде под своја закрила. Ми даде верба дека и јас имам глас и дека вредам. Станавме најдобри пријателки. Бевме вистински поддржувачи еден на друг, меѓусебна поддршка во лошите односи, цимери и понекогаш повеќе од тоа. Таа секогаш веруваше во мене, дури и кога јас не верував во себе“, раскажа таа, а потоа се осврна зошто се оддалечиле.

„Ние бевме млади. Дозволивме надворешни и внатрешни влијанија да го нарушат нашето пријателство. Така, јас сум благодарна што Шенон и јас бевме во можност да станеме пријателки и како возрасни и да се сетиме зошто навистина се сакавме и што можевме да се смееме повторно како порано“, продолжи таа во објавата.

„Таа беше бунтовничка кога на повеќето жени не им беше удобно да се чувствуваат силни. Никогаш не се обидуваше, туку беше. Таа беше олицетворение на сексипилност, сила, емпатија, сето тоа со примеси на откачен хумор. Шен, ќе продолжам да го носам твојот факел и ќе останам бунтовна за тебе. Те сакам со сето мое срце и засекогаш“, заклучи таа во својата објава.

Пријателството на Тори и Шенон беше тензично некое време, а и двете зборуваа за тоа во подкастот на Шенон „Да бидеме на чисто“.

„Секогаш беше лесно да те залажуваат. И тоа беше многу фрустрирачко за мене, бидејќи секогаш знаев да ти кажам: ‘Ајде Тор, имај свое мислење’. Те сакав и сакав да веруваш во себе исто како што јас верував во тебе“, рече тогаш Доерти.

Актерката открила и дека почнале да се оддалечуваат бидејќи Тори не ја прекинала проблематичната врска со бившиот дечко, кој бил лошо влијание.

Тажната животна приказна на Шенон Доерти: Девет години се бореше со ракот, но никогаш не помисли да се откаже