Tренерот на канадскиот тенисер Феликс Оже-Алијасим, Тони Надал му честиташе на Новак Ѓоковиќ за освоената титула на Ролан Гарос.

Ѓоковиќ во неделата триумфираше на Ролан Гарос откако во финалето го победи Каспер Руд со 7:6 (7:1), 6:3, 7:5. Српскиот тенисер со победата во Париз стигна до 23-тиот грен-слем трофеј во кариерата.

Тони Надал кој е чичко на Рафаел Надал не штедеше честитки и за поразениот Руд.

„Кога започна Ролан Гарос, напишав дека Руд е еден од фавортите за финале и дека ќе се бори за титула. Сметајќи го и ова неделно финале, за него тоа беше трето грен-слем финале во последната година. Такво нешто им успеало само на неколку тенисери. Кога ќе успее да го освои, со големо задоволство ќе славам затоа што еден тенисер кој комбинира убав и фер-плеј тенис го достигна врвот во нашиот спорт“.

Потоа следуваше и честитката за Ѓоковиќ.

„Кога во прашање е Ѓоковиќ, со уште едно големо воодушевување ми останува да му честитам и да му посакам да ужива во ова неверојатно достигнување со семејството и членовите на тимот“, заклучува Тони Надал.