Директорот на Служба за општи и заеднички работи, Ивица Томовски, вели дека е потребно да се набави нов владин авион со кого би се превезувале владините функционери кога одат на посети во странство.

-Можеби и половен авион, но, не постар од 2-3 години. Сериозно е да имате сериозно летало. Сум разговарал со повеќе лица и кај сите има заинтересираност да дискутираме околу набавка на нов, поголем авион со барем најмалку 14 седишта, за да собере поголема делегација, истакна Томовски.

Според проценките, нов авион би чинел од 30 до 40 милиони евра и повеќе, а опцијата за половен авион би чинела околу 15 милиони евра. Сепак, Томовски нагласува дека одлуката треба да ја донесат стручни лица, како пилоти и авиомеханичари, кои најдобро ја разбираат состојбата на пазарот и барањата за безбедност.

Томовски вели дека моменталниот авион, со кој се превезуваат државните службеници, е во дефект и е на сервис.

-Многу често ни се случуваат дефекти. Сегашниот авион е на сервис бидејќи протекува гориво од резервоарите. Тоа е сериозен проблем. Претседателот на Собранието беше приморан да се враќа во Македонија со редовни летови и други проблеми кои произлегуваат од одржувањето. Немаше полетување со него…, рече Томовски.