Четири опозициски партии и невладини организации во Нови Сад денеска поднесоа иницијатива за одземање на титулата почесен граѓанин на градот на рускиот претседател Владимир Путин. Барањето е поднесено до претседателката на градското собрание на Нови Сад, Јелена Маринковиќ Радомировиќ.

Оваа титула Путин ја доби во 2008 година, на предлог на партијата на Војислав Шешељ, Српската радикална странка. Подносителите на иницијативата велат дека Путин е диктатор и агресор и затоа е неприфатливо тој да биде почесен граѓанин на Нови Сад. Посочија дека рускиот претседател е одговорен за смрт на цивили, уништени домови, патишта.

Народната претставничка на Движењето на слободни граѓани, Ана Орег, оцени дека Путин „негува и финансира се што е антиевропско“ во Србија, од луѓето до вредностите, а неговата цел е да предизвика нестабилност во Србија, и нејзино поткусурување во меѓународните односи.

„Срамота е Путин да му подарува новогодишна елка на Нови Сад, додека во исто време ѝ носи на Украина уништени домови, семејства. и градови“, изјави Ана Орег.

Партиите и невладините организации велат дека ако Нови Сад не му ја одземе титулата на Путин, тоа ќе биде срамно.

Во Србија во последните месеци се чини дека добиваат на гласност иницијативите и протестите против руската инвазија врз Украина. Тие, сепак, се многу поретки и имаат помалку поддржувачи од иницијативите за поддршка на руската агресија, во чии рамки досега беа организирани повеќе големи проруски собири.