Тодоровски: Работнички посакува позитивен исход против Шкендија
![](https://www.slobodenpecat.mk/wp-content/uploads/2023/11/тодоровски-работнички.jpg)
Фудбалерите на Работнички по ремито без голови против Гостивар утре ќе патуваат за Тетово на дуел против Шкендија. Во 16 коло од Првата македонска лига Работнички ќе се обиде да оствари успех против еден од најквалитетните ривали во шампионатот.
Играчот за врска Димитар Тодоровски верува дека Работнички има квалитет да освои бодови од ова тешко гостување.
– Првенството влезе во забрзан ритам во пресрет на крајот на оваа полусезона. Следно искушение е Шкендија, квалитетен тим кој посебно добро игра на домашен терен во Тетово, но ние покажавме дека можеме да се надигруваме со нив на претходните дуели оваа сезона. Со максимално залагање и сериозен пристап, верувам дека можеме да ја исполниме целта и да освоиме бодови во Тетово – вели Тодоровски.
Натпреварот меѓу Шкендија и Работнички ќе се игра на Градскиот стадион во Тетово, со почеток од 13.00 часот, а ќе го суди Александар Грујоски од Кичево.
Моментно на табелата во првенството „романтичарите“ се на петтата позиција со 20 бодови, додека тетовските „црвено-црни“ се второпласирани со 29.