Претседателката на Европската комисија, Урсула фон дер Лајен, ќе се соочи со предлог за недоверба од крајно десничарските европратеници на 10 јули во Европскиот парламент.

„Ова се иницијативи што спаѓаат во прерогатив на членовите на Европскиот парламент“, беше коментарот на Паола Пино, портпаролка на Комисијата, на прашањата на новинарите во врска со предлогот за недоверба.

Пино се ограничи на кратки изјави, истакнувајќи дека „ Фон дер Лајен ќе учествува во дебатата“ за предлогот за недоверба, што ќе се одржи во понеделник на пленарната седница на Европскиот парламент во Стразбур.

На прашањето за присуството на Колегиумот на комесари во постапката, таа одговори дека „Колегиумот на комесари ќе биде во Стразбур, како и обично, за да присуствува на пленарната седница, до степен до кој на дневен ред има точки што се однесуваат на нивното сопствено учество“.

Крајнодесничарскиот романски европратеник Георге Пипереа, кој го иницираше предлогот за недоверба, го осудува недостатокот на транспарентност на Урсула фон дер Лајен во врска со кратките пораки разменети со извршниот директор на Фајзер, Алберт Бурла, за време на пандемијата на Ковид-19, кога Европската унија преговараше за купување вакцини.

Пипереа, исто така, ја обвинува Европската комисија за „мешање“ во претседателските избори во Романија.