Доцна синоќа полицијата извршила разговор со малолетен жител на велешкото село Горно Оризари, откако тој не запрел на знак од полицајци, по што удрил во еден од полицајците и во нивното возило и избегал од местото, соопшти МВР.

„На 08.07.2025 во 00.30 часот, во СВР Велес, извршен е службен разговор со малолетник од село Горно Оризари, велешко, во присуство на родител и социјален работник од Центар за социјални работи Велес. Имено, во село Горно Оризари, додека управувал мотоцикл без регистарски ознаки, не запрел на даден знак од полициски службеници кои извршувале службени задачи и удрил во еден од нив, а потоа и во паркирано патничко возило „шкода“, сопственост на Министерството за внатрешни работи, по што се дал во бегство. По преземени мерки, малолетникот е пронајден, известен е јавен обвинител, а мотоциклот е одземен. По документирање на настанот, против малолетникот ќе биде поднесен соодветна пријава“, пишува во полицискиот билтен.