Кошаркарите на Париз го победија Монако со 94:82 во првиот натпревар од финалето на плејофот во француското првенство.

Репризата од минатогодишното финале започна со победа на Париз, кој ја одбрани предноста на домашен терен во првиот меч.

Македонскиот репрезентативец Ти Џеј Шортс беше најефикасен во редовите на Париз со 30 поени, шест асистенции и исто толку скокови. Надир Хифи постигна 18, Тајсон Вард 16, а Микаел Јантунен 10 поени.

Без суспендираниот Мајк Џејмс, Мамаду Заите го предводеше тимот на Монако со 17 поени и девет скокови. Алфа Диало заврши со 16 поени, а Метју Стразел имаше 10.

Вториот натпревар од финалето е закажан за вторник во 20.30 часот, повторно во Париз, а потоа серијата се сели во Кнежевството. Монако ја брани титулата во француското првенство од минатата година, додека Париз го бара својот прв трофеј во своето второ финале.