Историја во француската кошарка, Париз ја освои титулата во лигата за прв пат во историјата на клубот. Во решавачкиот, петти натпревар од финалето во тамошното првенство, тие го победија Монако со 99:93 на домашен терен.

Може да се каже дека е шлагот на тортата и најубавиот можен крај на приказната што се случува во последните три години во Париз, со оглед на тоа што повеќето од најдобрите играчи и носители на играта, како и тренерот Тијаго Сплитер, си заминуваат.

Еден од играчите кои си заминуваат е македонскиот репрезентативец Ти Џеј Шортс, кој според најавите ќе биде плејмејкер на Панатинаикос од следната сезона.

Токму Шортс беше еден од најзаслужните за историската титула на Париз, блескаше и во последниот меч со 27 поени, 10 асистенции и седум скокови.

Надир Ифи, кој се поврзува токму во Монако, постигна 16 поени. Тајсон Ворд, кој потпиша за Олимпијакос, реализираше 11 поени. За тимот на Спанулис, Дијало постигна 18, Џордан Лојд 17, а Тарпи 16 поени.