Општинскиот совет во Тетово сѐ уште нема мнозинство, а конститутивната седница постојано се одложува, објави ТВ21.

„Во понеделник е закажана седница на советот, требаше денеска но поради состојбите, не се одржа. Другиот понеделник ќе се закаже и ќе ги дознаете околностите во врска со советот“, изјави градоначалникот Биљал Касами.

АА и ВМРО-ДПМНЕ, кои го поддржаа Касами во вториот круг, сега веќе имаат договор и за општинскиот совет. Според информациите на ТВ21, ВМРО-ДПМНЕ во Тетово ќе добие едно секретарско место во општината и едно директорско место. И од АА велат дека имаат договор, но не откриваат детали.

„Имаме договор за мнозинство во советот, но деталите ќе се објават на првата седница која се очекува да се одржи во четврток“, велат од Алијанса за Албанците.

Појасни околу формирањето мнозинство се советниците од граѓанската листа Најдоброто за Тетово. Од оваа иницијатива велат дека нема да учествуваат на седницата доколку таа не биде онлајн и доколку не се објават имињата на сите оние кои примаат плата, а не се појавиле на работното место.

„За листата Најдоброто за Тетово главен приоритет е имплементацијата на трите столба на нашата платформа. Транспарентност и отчетност, чиста средина и град со стабилен урбанистички план. Во советот ќе соработуваме за секое прашање кое ќе биде за доброто на граѓаните на Тетово“, додаваат од независната листа.

Движење Беса е во преговори и со двајца советници од СДСМ, но поради влошувањето на ситуацијата на централно ниво, сѐ уште нема договор на локално ниво. Тоа што е познато досега е дека мнозинството во Советот ќе треба да го сочинуваат 16 советници, а досега има само 14, и тоа меѓу ВМРО и АА, ДУИ со 10 советници и ДПА со 2 пратеници ќе останат во опозиција.