Со цел повторно да игра во Втората лига, ФК Тетекс работи на фузија со фудбалскиот клуб на Лабуништа.

Оваа информација ја потврдија членови на управниот одбор на тетовската екипа. Екипата на Лабуништа веќе го промени своето седиште од Лабуништа во Тетово и пристапи од ОФС Струга кон ОФС Тетово.

Првично клубот ќе носи името ФК Лабуништа 2011 Тетово, додека на полусезона според правилата ќе му биде дозволено да се преименува во ФК Тетекс Тетово. Промената веќе е регистрирана и во Централниот регистар.

Членот на УО на ФК Тетекс, Мирче Блажевски изјави дека постапката е во тек и се очекува конечна одлука од федерацијата.

Eкипата се подготвува за новата сезона со тренинзи во Тетово, поточно во игралиштето во село Порој. Во текот на летниот преоден рок беше ангажиран Меритон Салији од редовите Ренова, кој и претходно играше за Тетекс. Мирослав Јованоски исто така се враќа во Тетекс од ФК Гостивар.