Во тешка сообраќајна несреќа вечерва на патот Кавадарци – Ресава кај Тиквешкото Езеро, повредени се четворица луѓе, меѓу кои и едно дете потврди за МИА „Ристе Самарџиев“, портпарол на Сектор за внатрешни работи Велес.

Според првичната информација, во полициската станица Кавадарци лекари од Итната медицинска помош пријавиле дека на локалниот пат Кавадарци – село Ресава кај месноста викана „Криви дол“, во близина на Тиквешко Езеро, се случила сообраќајна несреќа во која учествувале два автомобила.

Повредени се четворица, кои со возила на Брзата помош се префрлени во болницата во Кавадарци.

Раководителот на Итна медицинска помош, доктор Ратко Грков, за МИА информира дека станува збор за тешка сообраќајна несреќа. Двајца од згрижените имаат тешки повреди.

Според првичните информации, станува збор за двајца млади луѓе на возраст од околу 30 години, средовечно лице, како и дете на возраст од 12 години.