Тензии помеѓу Чеферин и Инфантино: УЕФА ја нападна ФИФА!
Иако се очекуваше редовниот Конгрес на ФИФА, одржан во четвртокот, да помине мирно и без потреси, беше обележан со скандал и силна реакција од редовите на Европската фудбалска унија (УЕФА).
Препорачано
Наместо во планираниот термин во 11:30 часот, Конгресот започна дури во 17:45 со повеќечасовно доцнење на првиот човек на ФИФА, Џани Инфантино. Официјалното образложение беше неговата презафатеност, откако во претходните денови остварил средби со американскиот претседател Доналд Трамп, принцот на Саудиска Арабија и емиорот на Катар. Но, токму ова „оправдување“ предизвика бурни реакции.
Во својот воведен говор, Инфантино се обиде да го минимизира доцнењето со изјава дека „како претседател на ФИФА мора да носи одлуки кои се во интерес на организацијата“. Но, за голем дел од европските делегати тоа не беше доволно. Тие демонстративно ја напуштија салата веднаш по неговото обраќање и не учествуваа во понатамошните активности на Конгресот.
Први ја напуштија салата претседателот на УЕФА, Александар Чеферин, претставничката на англиската Фудбалска асоцијација Деби Хјует и претседателката на Норвешкиот фудбалски сојуз, Лис Клавенес.
Следниот ден, УЕФА излезе со невообичаено остро соопштение, во кое директно го обвини Инфантино дека ги ставил „своите приватни политички интереси пред обврските што ги има кон светскиот фудбал“. Во соопштението се посочува дека Конгресот на ФИФА е еден од најзначајните настани во светот на фудбалот, на кој учествуваат 211 национални федерации и се дискутира за иднината на играта.
„Нашите домаќини од Парагвај и партнерите од КОНМЕБОЛ направија сè за да нè угостат и да го организираат настанот беспрекорно. Но, ненадејната промена на агендата поради лични интереси го нарушува угледот на фудбалот и испраќа погрешна порака. Сите ние сме тука за да му служиме на фудбалот од уличните игралишта до големите сцени. Затоа, делегацијата на УЕФА почувствува обврска да испрати јасна порака дека фудбалот мора да остане приоритет“, се вели во соопштението.
Оваа реакција отвора нова пукнатина во односите меѓу УЕФА и ФИФА, кои и претходно беа обележани со разлики по клучни прашања за иднината на спортот.
