Жестоки расправии, навреди и меѓусебни обвинувања помеѓу градоначалничката Данела Арсовска и советниците во градскиот совет предизвика Информација за актуелната финансиска состојба на Град Скопје и на јавните претпријатија која ја побараа советниците од СДСМ и коалицијата и која беше точка на дневниот ред на денешната седница. Бараната информација не беше доставена до советниците написмено, туку Арсовска од говорницата се обиде да даде свое објаснување обвинувајќи ги и советниците, но и претходните градоначалници за состојбата во градот.

Градоначалничката тврдеше дека финансиската ситуација на Град Скопје е консолидирана, дека Градот добро функционира, кредитниот рејтинг е позитивен, драстично е зголемен лимитот за кредитни задолжувања. Според неа, со лагите што ги шират советниците, како што рече, создаваат страв кај граѓаните, кај доверителите и кај сите што треба да соработуваат со градот.

 Кој ќе одговара за штетатат нанесена врз угледот на овој град за безобразните лаги што се изнесуваат во јавноста од одредени советници? – праша Арсовска алудирајќи на тврдењата во медиумите дека Град Скопје е пред банкрот.

Во однос на состојбата на јавните претпријатија таа им порача на советниците дека околу 500 луѓе имаат во управни и надзорни одбори кои им ги доставуваат финансиските извештаи, па според тоа знаат каква е состојбата на јавните претпријатија.

Вие раководите со јавните претпријатија, ваши луѓе се тие, вашите луѓе гласаат во овие јавни претпријатија, вашите луѓе ги блокираат да не можат да работат функционално. Не ги гласаат одлуките што им се потребни за да можат да се консолидираат во делот на финансиите. Сакате да покажете дека некој не е способен да води, а всушност вие сте тие што ги блокирате сите процеси – обвини Арсовска.

Таа неколкупати повтори дека Градот нема блокирана сметка и да не бил хакираниот напад на Министерството за финансии, како што тврдеше, сите обврски тековно ќе се подмиреле.

Градоначалничката обвини дека сето кажано на седницата е гола политика и дека Град Скопје има спорови за кои треба да исплати огромни штети направени од претходните раководства на Град Скопје. Посочи дека во 2017 е покренат спор со Комерцијална банка, градот е тужен за 1 171 000 евра, пришто за судски трошоци и камати треба да се исплатат уште толку пари. Друштво за градежништво „Интернационал ДООЕЛ“ преку судски спор, побарувало речиси три милиони евра, плус камати, а за спорот со Скопски саем, треба да се исплатат речиси два милиони евра и 480 илјади евра камати. За Галиите, Град Скопје треба да исплати надомест за штета од 68 милиони евра. Милионски суми се побаруваат, а милионски се сумите и за камати, се пожали Арсовска.

Координаторката на советничката група на СДСМ, Љубица Јанчева повторно праша дали е блокирана сметката или не и побара да им се достави дневен извештај за состојбата на сметката.

Ако финансиската состојба е добра тогаш каде се парите? До каде е изградбата на мостот на Љубљанска за кој имате 380 милиони денари пари од Влада? До каде е реконструкцијата на Универзална сала за која имате 120 милиони денари од Влада? До каде е изградбата на клучката Момин Попток ,за која имате 3 милиони евра пари од Влада? До каде е проектот за БРТ за кој има пари од кредит си гаранција на Влада од 70 милиони евра? До каде е проектот за пречистителната станица за која и кредит и грант имаме 136 милиони евра? – праша Јанчева, наведувајќи и други проекти започнати од претходното градско раководство, кои до денеска не се завршени.

Таа и укажа на градоначалничката дека Град Скопје не започнува од моментот кога Арсовска станала градоначалник и дека нејзина обрска, како и на сите останати градоначалници е да ги сервисира долговите и да работи.

 Градот не почнува и завршува со вас. Го запаливте Скопје. Час поскоро консолидирајте го градот оти ќе биде лошо за сите нас – рече Јанчева.

Арсовска реплицираше дека единствено нешто што го запалило Скопје е коалицијата на СДСМ и ВМРО-ДПМНЕ и ја обвини Јанчева дека лаже. Според неа, проектите ќе биле завршени многу одамна да не морало сега да се решаваат имотно-правните прашање кои не биле ни започнати.

Кавга настана и околу наплатата на данокот, кога Арсовска повторно го обвини директорот на Катастар дека крие податоци за да ги скрие имотите на функционерите од двете партии, на што Јанчева жестоко реагираше и ја праша градоначалничката врз основа на што извлекува такви податоци и како не им било проблем на претходните гарнитури да ги добиваат податоците и да се врши наплата на данокот.

Обвинувањата и навредите стигнаа дотаму што Арсовска дури ја нарече Јанчева уличарка затоа што дофрлала од место кога градоначалничката била на говорница.

Во дискусијата се вклучи и советникот Гордан Шутаров кој посочи дека обвинувањата не се во ред затоа што не е фер советниците од медиумите да дознаваат што се работи во Град Скопје.

Советот има право да ги има податоците за финансиската состојба, дел сме од законодавната власт која има обврска да ја контролира работата на градоначалникот, да бара одговори, а не да не обвинувате дека не работиме во интерес на граѓаните. Две години се информираме преку медиумите, тоа не е во ред – рече Шутаров.

Информација за актуелната финансиска состојба на Град Скопје и на јавните претпријатија беше прва точка на дневен ред на  седница, која само покажува дека претстои уште една тензична седница на Советот на Град Скопје.