Тенисерите на ТК „Југ“ се старо-нови шампиони на Македонија откако денеска ја одбранија титулата во рамките на Македонската лига. Тие во финалето остварија максимална победа од 5:0 против тимот на Поинтер добивајќи ги сите сингл мечеви, а потоа мечевите во двојки не се играа. Во дуелот за третото место Неготино го совлада тимот на МТП со резултат 4:1.

Во составот на Југ за лига дуелите беа пријавени: Томислав Јотовски, Бесир Дургути, Шендрит Деари, Калин Ивановски, Берк Бугариќ, Дарко Колевски, Димитар Грабул, Филип Стојановски, Александар Трифунивски, како и тенисерите од Буграија Петар Нестеров и Габриел Донев, а улогата на капитен ја имаше Владимир Андонов.

ТК Поинтер го освои второто место исто како и лани, а овој тим клучната победа ја оствари вчера во дуелот со ТК Неготино, кога и избори пласман во финалето.

Од утре среда на терените на ТК Југ ќе стартуваат мечевите во државното првенство на Македонија за мажи и за жени.

Финале: Југ – Поинтер 5:0
Сингл:
Петар Нестеров – Обрад Марковски 20 предаде Марковски
Габриел Донев – Марко Стоилковски 62 30 предаде Стоилковски
Томислав Јотовски – Михаил Кусески 76(3) 61
Шендрит Деари – Илија Мартиноски 20 предаде Мартиноски
Берк Бугариќ – Максимилијан Алексовски 60 62