Тендерот за компресорска станица на Клинички ќе биде „копи-пејст“?
Дали Министерството за здравство само ќе го „ископира“ тендерот за новата компресорска станица, на кој не се пријави ниедна фирма кога тој беше спроведен од заеднички служби на Клинички центар?
Препорачано
Доколку намерата не е само да се прекопира тендерот што беше еднаш неуспешен, тогаш зошто министерот за здравство Арбен Таравари побарал од заеднички служби да ја достават техничката спецификација за замена на опремата на централната компресорска станица, како и заеднички служби да назначат луѓе од своите редови што ќе ги дефинираат техничките спецификации и не само тоа – туку и да одговараат на стручните прашања поставени во текот на техничкиот дијалог и да вршат стручна евалуација на доставените понуди?! Дали при вториот тендер, ќе бидат потрошени повеќе пари отколку при првиот?
Дописот што министерот Таравари им го испратил завчера на заеднички служби, сведочи дека Министерството за здравство во огромен дел се потпира на службата за заеднички работи при спроведувањето и на новиот тендер.
„Исто така, благовремено ќе ве известуваме за текот на постапката, со цел од ваша страна да бидат преземени потребните активности околу градежните работи кои претходат пред набавката за замена на централната компресорска станица и замена на инсталацијата“, напишал Таравари во дописот до заедничките служби кој го обезбеди „Слободен печат“.
Ако ниедна фирма не се јави и на тендерот што ќе го спроведе Министерството за здравство, тогаш набавката на целата компресорска станица со пропратните елементи ќе биде извршена во четири очи, со директен договор.
Тендерот за набавка на компресорска станица во делот на предметот на набавка не може да се разликува суштински од причина што станува збор за ист предмет на набавка, велат од Министерството за здравство на прашањата на „Слободен печат“ во што се разликува тендерот што тие ќе го спроведат, споредено со оној на заеднички служби кој пропадна бидејќи ниедна фирма не се јави на повикот. Оттаму велат дека и нивниот тендер ќе биде со проценета вредност од 300 илјади евра, како претходниот.
-Средствата за реализација на предметот на набавка во овој случај ќе бидат обезбедени од Министерството за здравство, имајќи ја во предвид финансиската состојба на ЈУ од областа на здравството за потребите на јавните здравствени установи, универзитетски клиники, завод и ургентен центар–Скопје и ЈЗУ Универзитетски клиники, кои требаше да го финансираат предметот на набавка. Во однос на проценетата вредност известуваме дека ќе биде истата од претходно објавената постапка.
Задолжен за одржување на станицата за технички гасови е ЈУ од областа на здравството за потребите на јавните здравствени установи, универзитетски клиники, завод и ургентен центар–Скопје и ЈЗУ Универзитетски клиники, и од тие причини, како и во досегашната пракса при спроведување јавни набавки за потребите на ЈЗУ и Јавната установа, Министерството за здравство побара од оваа јавна установа да номинира лице или лица, кои ќе бидат активно вклучени и во самата постапка, и тоа од самиот почеток до целосна реализација на предметот на нaбавка, велат од Министерството.
Од Министерството молчат за мерењата што беа извршени на КАРИЛ и открија формалдехид во салите. Ниту колкава е концентрацијата, ниту препораките на акредитираната фирма, ниту изворот на формалдехидот не се познати.
Листата на чекање за операции се зголемува, а салите на КАРИЛ работат со надворешни компресори. Чекаат и критични пациенти, со рак на белите дробови, карцином на дебелото црево… Секој специјалист има своја листа на пациенти што чекаат, а поради користење на правото на годишен одмор, хируршките клиники не се на максималното ниво. Дел од салите уште се поврзани со старата компресорска станица, која ќе се менува на нов тендер откако беше прогласено дека од неа се шири реа.
Додека се чека новиот тендер за набавка, монтажа и пуштање во работа на станица за компримиран воздух со три компресори и сета придружна опрема (резервоари, сепаратор за отстранување на влага и масло) стана јасно и дека досегашниот компримиран воздух, кој всушност е лек – не соодветствувал на европските стандарди. Тоа го открила фирмата „Дрегер“, а „Слободен печат“ го обезбеди доказот за тие мерења што покажуваат зголемена маслена пареа и влага на компримираниот воздух што го прават истиот некомпатибилен со европскиот стандард. Затоа во пропаднатиот тендер се бараше да има и „сушач за компримиран воздух според европска фармакопеја, кој ќе обезбеди чистост на воздухот од гасови, масла и вода кои се содржат во компримираниот воздух“.
На пропаднатиот тендер за менување на компресорската станица не се пријави ниедна фирма, ама три дошле на лице место да го разгледаат теренот. Заеднички служби во тендерот на кој не се пријави никој, бараа цевките да бидат од бакар, да се специјално испитани за непропустливост и квалитет. Станува збор за цевки наменети за медицински гасови – кислород, компримиран воздух, азотен оксидул и вакуум што треба да ги опслужуваат 12-те операциони сали во оперативниот блок, од кои четири на ортопедија, две на неврохирургија и две на пластична хирургија.
