Веќе се пишуваше дека Гранит Џака со сите сили се обидува да издејствува трансфер во Сандерленд, но ако за тоа треба да решава новиот тренер на Баер Леверкузен, Ерик Тен Хаг, од тој договор нема ништо.

Според информации на германски „Билд“, швајцарскиот репрезентативец веќе ги договорил личните услови со премиерлигашот, кој понудил 10 милиони евра за неговиот потпис. Сепак, Леверкузен бара барем двојно повеќе за 32-годишниот играч од средниот ред и смета дека понудата од Англија е далеку од сериозна.

Агентот на Џака, Хозе Ногеира Родригез, вчера изјави дека клубот од Леверкузен му дозволил на неговиот клиент да преговара со други екипи. Но, Тен Хаг очигледно има поинакво гледиште.

„Не ме интересира што вели агентот. Овој клуб веќе продаде тројца важни фудбалери. Не можеме да дозволиме да си замине уште некој. Тоа би ја поткопало структурата и културата на тимот“, изјави Холанѓанецот.

Капитенот на швајцарската репрезентација потпиша петгодишен договор со Баер Леверкузен во 2023 година, кога пристигна од Арсенал. Беше стандарден член на шампионската екипа на Чаби Алонсо и е еден од клучните играчи во соблекувалната.

„Тој е лидер. Има уште три години од договорот и е премногу важен за нас“, дециден беше Тен Хаг.

Ова лето, на незадоволство на новиот тренер, клубот веќе ги загуби Џереми Фримпонг, Џонатан Тах и Флориан Вирц. Џака, засега, останува столб на новиот проект.