Антологискиот расказ „Страшна ноќ“ од Славко Јаневски, кој се смета за еден од најубавите раскази во македонската книжевност, стана дел од едицијата „Старо купувам“ на издавачката куќа „Темплум“.

Расказот „Страшна ноќ“, со помош на извонредната ликовна техника на уметницата Наташа Андонова, се претвора во сликовница што го привлекува вниманието на младите читатели, но не може да остане незабележана ни од читателската публика од сите возрасти.

Идејата на оваа едиција, која вклучува домашни автори – поети, писатели, уметници и илустратори, е да се спојат старите и новите автори, но и старите, класични вредности, со новите, актуелни вредности.

Постарите, делумно подзаборавени дела на значајни претставници на македонската книжевност, преку оваа едиција добиваат ново руво, односно за првпат овие текстови се објавени во вид на сликовници, визуелно поддржани од страна на најдобрите современи уметници и дизајнери.

Сликовницата „Страшна ноќ“ како дел од едицијата „Старо купувам“ е резултат на една вонвременска соработка со која се докажува дека вистинските вредности се трајни.

(Текстот е објавен во „Културен печат“ број 151, во печатеното издание на весникот „Слободен печат“ на 22-24 октомври 2022)