Комисијата за избор на кандидати за судија во Европскиот суд за човекови права, денеска во МНР го одржала вториот состанок на кој ги разгледала кандидатурите кои пристигнале во предвидениот рок.

Според сознанија на „Телма“, од 21 кандидат, деветмина отпаднале бидејќи не ги исполниле критериумите и условите предвидени во јавниот оглас.

Останатите дванаесетмина, кои ги исполнуваат условите, во среда ќе бидат повикани на интервју, по што ќе следува изборот на тројца кандидати кои како предлог-листа ќе бидат доставени до Владата. Меѓу оние што не ги исполниле условите има и судии, обвинители, адвокати и правници по професија, но засега нема информации за тоа кои кандидати продолжуваат на интервју, а кои испаднале на конкурсот.

Во вкупниот број кандидати беа обвинителката Ленче Ристоска, судијките Оља Ристова, Габриела Гајдова и Едита Насковска, поранешниот претседател на ДИК, Александар Даштевски, адвокатите Тони Менкиновски, Валентин Пепељугоски, Ирена Ристиќ, поранешната директорка на Академијата за судии и јавни обвинители Наташа Габер-Дамјановска и други правници.