Почнувајќи од септември, теглите со словенечки мед со заштитена географска ознака сега ќе бидат опремени со кјуар код, кој ќе им овозможи на потрошувачите директно да пристапат до информации за производителот на мед.

Здружението на пчелари на Словенија е убедено дека новото технолошко решение ќе ја зголеми свеста кај потрошувачите, а воедно ќе ја намали и можноста за лажен мед. Според нив, кјуар кодот ќе им овозможи на потрошувачите директно да пристапат до клучни информации за производителот: нивното име, локација, година на вклучување во шемата, податоци за извршените инспекции и обуки и линк до веб-страницата за пчеларство каде што е произведен медот, пишува Н1 Словенија.

„Ова технолошко решение ја зајакнува довербата и безбедноста и ја зголемува свеста кај потрошувачите, а воедно дополнително ја намалува можноста за злоупотреба и фалсификување, кои се сè почести на пазарот на мед“, нагласија тие.

Како што потсетија тие, добрите практики во пчеларството во Словенија се предуслов пчеларите да произведуваат мед што ги исполнува критериумите за квалитет повисоки од оние дефинирани со Европската директива за мед. Европските шеми за квалитет, исто така, играат важна улога во обезбедувањето и препознавањето на квалитетот, гарантирајќи им на потрошувачите потекло, следливост и контролиран квалитет на медот.

Словенија има четири заштитени видови мед од европските шеми за квалитет: словенечки мед со заштитена географска ознака, шумски мед од Кочевје, карстски мед и истарски мед со заштитена ознака за потекло.