Технички проблем во британската контрола на летање во средата предизвика сериозни прекини на воздушниот сообраќај, при што беа суспендирани летовите на повеќе големи аеродроми, меѓу кои Хитроу, Гетвик, Лондон Сити и Единбург, пишува Ројтерс.

Националната служба за контрола на воздушниот сообраќај (NATS) соопшти дека инженерите успеале да го обноват системот и дека е започнат процесот на враќање на нормалните операции, особено во областа на Лондон.

„Нашите инженери го обновија системот што беше засегнат попладнево. Во процес сме на продолжување на нормалните операции“, соопшти NATS преку Икс.

Проблемот предизвика хаос на аеродромите – Хитроу објави целосна суспензија на полетувањата, додека Гетвик и Лондон Сити известија дека поаѓањата се одложени или стопирани. И аеродромот во Единбург соопшти дека заминувањата се одложени додека се чекаат дополнителни информации од надлежните служби.

Иако проблемот е технички решен, се очекува уште неколку часа да има доцнења додека се нормализира целиот воздушен сообраќај. Властите апелираа до патниците да ги следат објавите на аеродромите и да се информираат за статусот на своите летови.