На отворен простор и со неформалната театарска група „Арт-манија“, на 7 јули на брегот на Охридското Езеро, близу „Скаут камп“ во Струга, премиерно беше изведена претставата за деца, младинци и возрасни со наслов „Океанија“.

Текстуалната предлошка за претставата е земена од сликовницата „Океанија“ на Мартин Миљев, кој во музичките кругови е познат со уметничкото име Мартикс, а сега за првпат се појавува како автор на текст и драматург на театарска претстава.

Режисер на претставата е Мирослав Петковиќ, сценографи се Бојан Секулоски, Викторија Попоска и Милко Нестороски, а на костимографијата работеше Ана Кркулевска Попоски.

Во соработка со „Јуроп хаус Струга“ претходно се одржала акција за чистење на брегот на езерото, а дел од собраните отпадни предмети се употребени за сценографијата на претставата. Притоа се одржала и инклузивна работилница на која сценографите работеле заедно со лица со попреченост.

Претставата немаше да се случи без посветената актерска игра на Дарко Карбески, Иларија Гулеска, Ѓорѓи Крстески, Александра Ангелкоска, Мишо Димитријевски, Надја Секулоска, Ангела Грујоска, Јана Танеска, Тијана Куковска, Сара Петровска и Чедомир Митевски.

Дел од уметничката екипа на претставата се и илустраторот Oрце Нинески, дизајнерот Игор Спасовски, на музиката и тонот работеа Бојан Топалоски, Владимир Мојсовски и Мартин Миљев, а светлото го намести Бобан Смилкоски. Претставата ќе има уште неколку изведби до крајот на летото на истата локација близу „Скаут камп“ во Струга.