Татко со двајцата синови со клоци и тупаници и со камен по главата претепале жител на селото Батинци поради расправија што ја имал со еден од синовите. Скопското обвинителство отвори истражна постапка за тепачите кои ги сомничи за насилство и побара притвор за таткото и еден од полнолетните синови.

– Таткото на возраст од 41 година, заедно со синовите од кои едниот на возраст од 18 години, а другиот 15-годишно дете, дошле пред семејната куќа на еден оштетен во селото Батинци и започнале да му се закануваат, поради претходна расправија на оштетениот со детето. Во еден момент, почнале да го удираат со клоци и тупаници по главата и целото тело, од кои удари оштетениот паднал на земја. Додека лежел на земјата, детето го удирало и со камен, па оштетениот се здобил со тешки телесни повреди – фрактури и други тешки повреди во главата и телото – соопшти Обвинителството.

Сопругата дошла на помош и паднала врз тепаниот за да го заштити од дополнителни удари, а притрчале и децата и соседите.

– Со дејствијата на насилство, малтретирање, грубо навредување и загрозување на сигурноста, осомничените предизвикале чувство на несигурност и страв и кај членовите на семејството на оштетениот и во јавноста – велат од Обвинителството.