Министерот за здравство Арбен Таравари на прес-конференција ги потврди наводите од истражувањето на „Слободен печат“ според кое, на Клиниката за кардиохирургија ангиографската сала не работи, зашто апаратот е претежок за конкретната подна конструкција. Апаратот бил прво купен од страна на Министерството за здравство па после се гледало дали ќе го издржи армираната конструкција на вториот кат на Клиниката. Затоа сега операционата сала е затворена и пациентите нема каде да се оперираат освен во приватните болници. Нема информации за протоколи за нивно упатување, поточно, кога денеска би дошол пациент на Кардиохирургија со дијагнозата од која почина 57-годишниот Тони Ангелковски, не е извесно како би се лекувал.

-Обично, кога набавуваме апарати клиниката ни кажува каков да набавиме и вистина е дека побарале да се стави посигурна конструкција за да не згрешиме, за да биде за два или три тона – подобро сме го осигурале, изјави Таравари.

Тој формирал стручна комисија која ќе ја испитува стручноста на лекарите од Кардиохирургија во нивното медицинско постапување кај пациентот Тони Ангелковски кој почина. Таравари пак рече дека „не знае зошто семејството одбило обдукција“ но и дека „Клиниката решила да го третира конзервативно“ а не да се оперира. Спротивно на ова, семејството тврди дека биле упатувани во приватни клиники за да бараат операција за реконструкција на аортата, а на крајот било одлучено операцијата да се направи во странство.

На прашањата каде да одат пациентите на кои ќе им биде потребна ваква иста интервенција, директорот на ФЗОМ Сашо Клековски рече:

-Двете приватни кардиохирургии Жан Митрев и Систина имаат новосклучен договор со фондот за 2025 и ваквите операции не може да бидат „потрошени“ во април месец. Ако воопшто така одговориле од било кого, тоа не е точно. Во усната комуникација со „Жан Митрев“ негираат дека имале таков пациент. Тие велат добиле це-де со снимките и усно тврдат дека рекле да биде донесен пациентот. Сите тврдат дека пациент во животозагрозувачка ситуација нема да биде вратен, рече тој.

Хируршката сала на Кардиохирургија е затворена за да не се случи „натстрешница“?!