Густав Шефер, тапанарот на групата „Токио Хотел“, во петокот бил на божиќниот пазар во Магдебург, каде се случи голема трагедија. Да потсетиме, маж уби четири жени и деветгодишно момче кога со автомобил влета на божиќниот пазар. Покрај загинатите, во нападот беа повредени и повеќе од 200 луѓе.

„Не можам да го опишам со зборови во моментов она што се случи во нашиот град Магдебург. За среќа, ние сме добро, но многу луѓе не се. Моите мисли се со сите оние кои изгубиле некој близок“, 36-годишниот напиша музичар на својата приказна на Инстаграм.

На божиќниот пазар пристигнал со сопругата и ќерката, а само неколку моменти подоцна се случил нападот.

Подоцна тој се огласи уште еднаш.

„Вчера требаше да биде безгрижен ден на божиќниот пазар во Магдебург – полн со светла, смеа, љубов. Бевме само малку подалеку од моментот кој промени сè за многумина. Ништо не ни се случи и вечно сме благодарни за тоа, но, се чини дека светот за момент застана.

Моите мисли се со сите погодени од овој страшен настан. Сите сме ранливи и важно е да бидеме еден за друг. Внимавајте и бидете со вашите најблиски. Љубовта е посилна од стравот. Благодарност до сите што помогнаа на лице место“, напиша Шефер на Инстаграм.

Шефер живее со своето семејство во родниот град Магдебург. Останатите членови на бендот, близнаците Бил и Том Каулиц, моментално живеат во Лос Анџелес.

Десничарската АФД повика на голем митинг по нападот во Магдебург